काठमाडौँ । आगामी आर्थिक वर्ष २०८२/०८३ का लागि १९ खर्बको बजेट सिलिङ तय भएको छ । राष्ट्रिय योजना आयोगले आगामी आर्थिक वर्षको बजेटको सिलिङ करिब १९ खर्बको हुने गरी स्रोत अनुमान गरेको हो ।
अर्थ मन्त्रालय स्रोतका अनुसार राष्ट्रिय योजना आयोगले मंगलबार अर्थ मन्त्रालयमा पेश गरेको राष्ट्रिय स्रोतको प्रारम्भिक अनुमान तथा खर्च सीमा निर्धारण सम्बन्धी प्रतिवेदन २०८१ मा आउँदो आर्थिक वर्षका लागि १९ खर्ब हाराहारीको बजेट सिलिङ दिएको छ । अर्थमन्त्रीले जेठ १५ गते आउँदो आर्थिक वर्षका लागि बजेट पेश गर्नुपर्ने संवैधानिक प्रावधान छ ।
अर्थ मन्त्रालयले चालू आर्थिक वर्ष २०८१÷०८२ का लागि १८ खर्ब ६० अर्बको बजेट ल्याएको थियो । तर, वर्षमान पुनले ल्याएको बजेट कार्यान्वयन गरिरहेका वर्तमान अर्थमन्त्री विष्णु पौडेलले समीक्षामार्फत बजेटको आकार १६ खर्ब ९२ अर्बमा झारिदिएका छन् ।
