काठमाडौँ । बुद्धभूमि नेपाल हाइड्रोपावर कम्पनीले चालु आर्थिक वर्ष २०८१/८२ को दोस्रो त्रैमासको अपरिस्कृत वित्तीय विवरण सार्वजनिक गरेको छ। प्रकाशित वित्तिय विवरण अनुसार यस अवधिमा कम्पनीको खुद नाफा ९१.८४ प्रतिशतले बढेको छ। यस अवधिमा कम्पनीले ६२ लाख ५९ हजार रुपैयाँ खुद नाफा कमाएको छ। अघिल्लो आर्थिक वर्षको यसै अवधिमा कम्पनीको खुद नाफा ३२ लाख ६२ हजार मात्र थियो ।
समिक्षा अवधिमा कम्पनीको विद्युत बिक्रीको आम्दानी भने घटेको छ। कम्पनीको विद्युत बिक्री वापतको आम्दानी ९ करोड ५४ लाखबाट घटेर ९ करोड ११ लाखमा सिमित भएको छ। विद्युत बिक्रीको आम्दानी घटे पनि कम्पनीको ब्याज खर्च घट्दा खुद नाफा बढेको देखिन्छ । अघिल्लो आर्थिक वर्षको तुलनामामा कम्पनीको ब्याज खर्च ५ करोड ५१ लाखबाट ४ करोड २८ लाखमा सिमित भएको छ।
यस अवधिमा कम्पनीको प्रति शेयर आम्दानी पनि १.६३ रुपैयाँबाट बढेर ३.१३ रुपैयाँ पुगेको छ। कम्पनीको प्रति शेयर नेटवर्थ भने ८४ रुपैयाँ ४८ पैसा कायम भएको छ। कम्पनीको चुक्ता पुँजी ४० करोड रहेको छ । कम्पनीले तिर्न बाँकि दिर्घकालिन ऋण ९३ करोड रहेको छ।
