काठमाडौं। नेपाल चेम्बर अफ कमर्सको आयोजनामा ‘आठौँ अन्तर्राष्ट्रिय व्यापार मेला–२०२५’ आजदेखि भृकुटीमण्डपमा सुरु भएको छ। पाँच दिनसम्म चल्ने यस एक्स्पोमा कम्तीमा ५० हजार दर्शकको सहभागिता रहने अपेक्षा गरिएको छ।स्वदेशी तथा विदेशी गरी १२५ भन्दा बढी स्टलहरू रहेका छन्। चेम्बर अफ कमर्सका अध्यक्ष कमलेशकुमार अग्रवालका अनुसार एक्स्पोले स्थानीय उत्पादनको प्रवर्द्धन, बजारीकरण तथा व्यापार वृद्धिमा टेवा पुर्याउने लक्ष्य लिएको छ।
“अन्तर्राष्ट्रिय व्यापार मेला एवं प्रदर्शनीले नयाँ प्रविधि, उपभोक्ताको रुचि तथा बजार विस्तारबारे जानकारी दिने अवसर प्रदान गर्छ,” अग्रवालले भने। यस्ता कार्यक्रमहरूले स्वदेशी उद्यमीलाई अन्तर्राष्ट्रिय बजारसँग प्रतिस्पर्धा गर्न सक्षम बनाउने उनको भनाइ छ।यस वर्षको एक्स्पोमा ‘सफ्टवयर’ तथा ‘एआई’ परियोजनाहरू मुख्य आकर्षणको रूपमा प्रस्तुत गरिएको छ। नेपालमा अन्तर्राष्ट्रियस्तरको प्रदर्शनी स्थल निर्माण गर्न सरकारसँग सहकार्य गर्न चेम्बर अफ कमर्स तयार रहेको अग्रवालले बताए।
कृषिजन्य उत्पादन, हस्तकला, लत्ताकपडा, अटोमोबाइल, इलेक्ट्रोनिक्स, घरेलु उपकरण, फर्निचर, गार्मेन्ट, छालाजन्य वस्तु, गहना तथा सौन्दर्य सामग्री एक्स्पोका प्रमुख आकर्षण रहनेछन्।
