काठमाडौं । दोस्रो ई-स्पोर्ट्स नेसनल च्याम्पियनसिपको क्वालिफायर राउण्डका खेलहरु अहिले सुरु भइसकेका छन्। ई-स्पोर्ट्स संघ नेपाल (इशान) को आयोजना र नेपाल प्लेजको व्यवस्थापनमा हुने यस च्याम्पियनशिपमा कूल ६ विधाहरु समावेश छन्, जसमा पब्जी मोबाइल विधा सबैभन्दा आकर्षक र चर्चित बनिएको छ।नेपालको पब्जी टिमले विश्वस्तरमा राम्रो प्रदर्शन गरेपछि यहाँका पब्जी खेलाडी पनि परिचित छन्। यस पटकको च्याम्पियनशिपमा कूल २५ लाख पुरस्कार राशी रहेको छ, जसमा पब्जी मोबाइल विधाका लागि १० भन्दा बढी पुरस्कार छन्।
पब्जी मोबाइलका लागि कूल १०३७ टिमले दर्ता गराएका छन्, जसमा लगभग ६ हजार खेलाडी र व्यवस्थापकहरु सामेल छन्। हरेक टिममा ४ मुख्य खेलाडी, १ अतिरिक्त खेलाडी र १ म्यानेजर रहनेछन्।सञ्चालकले नेपाली पब्जी समुदायमा परिचित ८ टिमलाई सिधै विभिन्न राउण्डमा इन्भिटेसन प्रदान गरेका छन्। यी ८ टिममध्ये ४ टिमलाई राउण्ड अफ ६४ मा, २ टिमलाई राउण्ड अफ ३२ मा र २ टिमलाई प्लेअफ (२४ टिम) मा सिधै इन्भिटेसन गरिएको छ।
स्लट प्राप्त गर्ने टीटुके र रोएल ड्र्यागनलाई राउण्ड अफ ६४ मा सिधै इन्भिटेसन गरिएको छ। साथै, हालै भइरहेको होरा सोडाउन पब्जी प्रतिस्पर्धाबाट शीर्ष दुई स्थानमा रहने टिमलाई पनि राउण्ड अफ ६४ मा इन्भिटेसन दिइएको छ।गत वर्ष सुर्खेतमा भएको च्याम्पियनसिपको विजेता होइन् इस्पोर्ट्स र बागमती च्याम्पियनसिपको विजेता लियो इस्पोर्ट्सलाई राउण्ड अफ ३२ मा सिधै इन्भिटेसन गरिएको छ। पहिलो संस्करणमा एचकेमर्डर्सर नामले प्रतिस्पर्धा गरेका लियो इस्पोर्ट्सले अहिले आफ्नो नाम परिवर्तन गरेर हइन स्पोर्ट्स बनाएको छ।
पब्जी मोबाइलको प्लेअफमा भने होरा इस्पोर्ट्स र डिआरएस गेमिङलाई सिधै इन्भिटेसन प्राप्त भएको छ। यी टिमहरू २४ टिम रहने प्लेअफमा प्रतिस्पर्धा गर्नेछन्। यी दुई टिमहरू पहिलो पीएमजिसीमा प्रतिस्पर्धा गरिसकेका थिए, जसका कारण उनीहरुलाई सिधै प्लेअफमा इन्भिटेसन गरिएको हो।
पब्जीका अन्तिम चरणमा १६ टिम सहभागी हुनेछन्। यो चरण भौतिक रूपमा आयोजना हुनेछ, जसमा सहभागीहरू त्रिपुरेश्वरस्थित दशरथ रंगशालको कभर्डहलमा प्रतिस्पर्धा गर्नेछन्। च्याम्पियनसिपको सबै क्वालिफायर र प्लेअफ खेलहरू अनलाइन हुनेछ भने केवल अन्तिम चरणको खेल ल्यान इभेन्टको रूपमा हुनेछ।
पब्जी मोबाइलको पुरस्कार राशी १० लाख १० हजार रहेको छ। विजेताले २ लाख ५० हजार नगद पुरस्कार पाउनेछन्। दोस्रो र तेस्रो स्थान प्राप्त गर्ने टिमहरूले क्रमशः १ लाख ८० हजार र १ लाख २० हजार पाउनेछन्। त्यस्तै, अन्तिम चरणमा प्रतिस्पर्धा गर्ने १६ टिमहरूले नगद पुरस्कार प्राप्त गर्नेछन्। यस विधामा एमभीपी (Most Valuable Player) पनि नगद पुरस्कारका हकदार हुनेछन्।
