१० माघ, काठमाडौं । प्रधानमन्त्री कप महिला राष्ट्रिय क्रिकेट प्रतियोगिता २०८१ अन्तर्गत बिहीबारदेखि सुरू भएको सुपर फोर चरणमा एपीएफ क्लबले विजयी सुरूवात गरेको छ। एपीएफले बागमती प्रदेशलाई सहजै १० विकेटले पराजित गरेको हो।
१८ ओभरमा छोट्याइएको खेलमा बागमतीले प्रस्तुत गरेको ४३ रनको झिनो लक्ष्य एपीएफले ६.५ ओभरमा कुनै विकेट नगुमाई पूरा गर्यो। एपीएफका लागि ममता चौधरीले अविजित २३ रन बनाइन् भने राजमती ऐरीले १४ रनको योगदान दिइन्।
यसअघि, टस हारेर पहिले ब्याटिङ गरेको बागमती प्रदेशले १८ ओभरमा ८ विकेट गुमाउँदै ४२ रन मात्रै बनाउन सफल भएको थियो। बागमतीतर्फ एली यादव र यशु पाण्डेले समान ८-८ रन बनाए। एपीएफका बलरहरूले उत्कृष्ट प्रदर्शन गरे। सुमन विष्टले ३ विकेट लिँदा, रेखा रावल र बिनु बुढाले २-२ विकेट लिए। साथै, कविता जोशीले १ विकेट हात पारेकी थिइन्।
