नुवाकोट । शैक्षिक, ज्ञानी, बौद्धिक, र प्रज्वलित समाज (अकिआस) संस्थाले आयोजना गरेको पाँचौँ अकिआस राष्ट्रिय खुला फुटसल प्रतियोगिता मंगलबार सफलतापूर्वक सम्पन्न भएको छ।फाइनल खेलमा नुवाकोटको सूर्यगढी नव युवा क्लबले रसुवाको डाँडागाउँस्थित रेड पाण्डालाई १–० गोल अन्तरले पराजित गर्दै उपाधि जित्न सफल भएको हो। यो जितले सूर्यगढीलाई फुटसल क्षेत्रमा नयाँ उचाइमा पुर्याएको छ।
प्रतियोगिताको फाइनल खेल माघ ४ गतेदेखि धुन्चेस्थित बालमन्दिर प्राङ्गणमा सञ्चालन भएको थियो। प्रतियोगितामा कुल १९ टोलीको सहभागिता रहेको थियो। उत्कृष्ट प्रदर्शन गर्दै सूर्यगढीले ट्रफी, मेडल, प्रमाणपत्रसहित २,०२,२२२ रुपैयाँ नगद पुरस्कार प्राप्त गर्यो। उपविजेता टोली रेड पाण्डाले मेडल, प्रमाणपत्रसहित १,०१,१११ रुपैयाँ नगद पुरस्कार जित्यो।फाइनल खेलमा दुवै टोलीका खेलाडीहरूले आक्रामक र समन्वयपूर्ण प्रदर्शन गरेका थिए। प्रतियोगिता अवधिभर उत्कृष्ट प्रदर्शन गर्ने व्यक्तिगत खेलाडीहरूलाई पनि प्रमाणपत्र र ट्रफी प्रदान गरिएको छ।
समापन समारोहमा प्रमुख अतिथि संविधान सभा सदस्य माननीय ई. मोहन आचार्यले खेलकुदको विकासमा आफ्नो योगदान रहने प्रतिबद्धता जनाए। प्रमुख जिल्ला अधिकारी अर्जुन पौडेल, नौकुण्ड गाउँपालिकाका पदाधिकारी, मध्यवर्ती वनका अध्यक्ष, जिल्ला खेलकुद विकास समितिका अध्यक्ष, सुरक्षाकर्मी, शिक्षक, विद्यार्थी, र पत्रकार लगायतको उपस्थिति रहेको थियो।
