काठमाडौं। आईसीसी यु–१९ महिला टी–२० विश्वकपमा नेपालले आज अस्ट्रेलियासँग प्रतिस्पर्धा गर्दैछ। माघ ५ र ७ गते खेलिएका दुई खेल पछि नेपालले बुधबार समूह चरणको अन्तिम खेलमा अस्ट्रेलियासँग सामना गर्ने तयारी गरेको हो।नेपालले पहिलो खेलमा बंगलादेशसँग पाँच विकेटले पराजय भोगेको थियो भने दोस्रो खेलमा स्कटल्याण्डसँग एक विकेटले पराजित भएको थियो। यस कारण, समूह चरणमा नेपाललाई अन्तिम खेलमा जित निकाल्नु पर्ने चुनौती रहेको छ।
मलेसियामा चलिरहेको प्रतियोगितामा यो खेल दिउँसो १२:१५ बजे सुरु हुनेछ। नेपाल समूह ‘डी’ मा रहेको छ जसमा बंगलादेश, अस्ट्रेलिया र स्कटल्याण्ड पनि छन्। अस्ट्रेलिया समूहको शीर्ष स्थानमा चार अंकका साथ रहेको छ। बंगलादेश र स्कटल्याण्ड समान दुई अंकका साथ दोस्रो र तेस्रो स्थानमा छन् भने नेपाल अंकविहीन अन्तिम स्थानमा छ।विश्वकपको समूह ‘ए’ मा मलेसिया, भारत, श्रीलङ्का र वेस्ट इण्डिज छन्। समूह ‘बी’ मा इङ्ग्ल्याण्ड, आयरल्याण्ड, पाकिस्तान र अमेरिका छन् भने समूह ‘सी’ मा न्यूजील्याण्ड, समोआ, दक्षिण अफ्रिका र नाइजेरिया छन्।
