काठमाडौं । बढ्दो खराब कर्जा, घट्दो ब्याजदर, कर्जा प्रवाहमा कमी, र पुराना ऋण असुलीमा समस्या जस्ता आर्थिक चुनौतीले फाइनान्स कम्पनीहरूलाई मर्जर प्रक्रियामा जान प्रेरित गरेको छ। हालसम्म १७ मध्ये ६ फाइनान्स कम्पनीले मर्जर प्रस्ताव पारित गरी कार्यान्वयनका लागि कदम चालेका छन्।
नेपालको पहिलो फाइनान्स कम्पनी नेपाल फाइनान्सको ३२औं साधारणसभाले मर्जरको प्रस्ताव पारित गर्दै अन्य बैंक तथा वित्तीय संस्थासँग गाभिने/गाभ्ने कार्यका लागि सञ्चालक समितिलाई पूर्ण अख्तियारी दिएको छ।
त्यस्तै, गुहेश्वरी फाइनान्स, मञ्जुश्री फाइनान्स, समृद्धि फाइनान्स, र पोखरा फाइनान्सले पनि आ-आफ्नो साधारणसभामा मर्जर तथा प्राप्तिका प्रस्ताव पारित गरेका छन्। यी प्रस्तावहरूले अन्य उपयुक्त बैंक तथा वित्तीय संस्थाहरूसँग गाभ्ने, गाभिने, वा प्राप्ति प्रक्रियाका लागि सञ्चालक समितिलाई आवश्यक निर्णय गर्न अधिकार प्रदान गरेका छन्।
मर्जरका लागि पहिचान, सहमति पत्रमा हस्ताक्षर, सम्पत्ति र दायित्व मूल्यांकन, र नेपाल राष्ट्र बैंकको स्वीकृति लिने लगायतका प्रक्रियाहरू तीव्र रूपमा अघि बढाइएको छ। फाइनान्स कम्पनीहरूले मर्जरलाई आर्थिक संकट समाधानका रूपमा अवलम्बन गर्दै यसको कार्यान्वयनमा सक्रियता देखाइरहेका छन्।
